फाटेको जुत्ता फाटेको भोटो
खिच खिच बाबू हामी गरिबको फोटो
पहिले पहिले माहाराजहरु आए
हामिसङ्ग फोटो खिचाए
हाम्रो फोटो देश बिदेश घुमाए
शहरमा आ-आफ्ना महल बनाए
फाटेको जुत्ता फाटेको भोटो
खिच खिच बाबू हामी गरिबको फोटो
त्यसपछी, विदेशी विकाशे संस्थाहरु आए
हामी र हाम्रा छोराहरुसंग फोटो खिचाए
अनेक योजना र परियोजना बनाए
कागजमा समृद्द कर्णाली बनाए
फाटेको जुत्ता फाटेको भोटो
खिच खिच बाबू हामी गरिबको फोटो
आजकल त, बिकाशे संस्थाहरु गनिसाध्य छैन, कति आए
हामी र हाम्रा छोरा नातिसङ्ग फोटो खिचाए
हाम्रा फोटोहरु संसार घुमाए
सबैले आ-आफ्ना महल बनाए
फाटेको जुत्ता फाटेको भोटो
खिच खिच बाबू हामी गरिबको फोटो
भोटो मेरो यहि हो , उहिले उहिले माहाराजसङ्ग फोटो खिचेको
भोटो मेरो यहि हो, उहिले विकासे संस्थासङ्ग फोटो खिचेको
भोटो मेरो यहि हो, छोरा नाति हुर्काएको
भोटो मेरो यहि हो, बाबुको क्यामाराले किटिक्क गरेको
भोटो मेरो यहि हुनेछ, यो धर्तिमा रहेसम्म
फाटेको जुत्ता फाटेको भोटो
खिच खिच बाबू हामी गरिबको फोटो
क्यामेरा त बाबुको ठूलो रहेछ
बाबुको संस्थापनी ठूलो न ठूलो होला नि
अनि साच्चै महल झन ठूलो होला नि
मन सानो भएर के भो त बाबू हैन र
फाटेको जुत्ता फाटेको भोटो
खिच खिच बाबू हामी गरिबको फोटो
No comments:
Post a Comment